Cekhabbus

Sanak sai : “tuhan, nyak mak haga mati, nyak haga mandi.”
Tuhan : “semahamu cekhabbus, tegagguk di batu kali.”
Malaikat : “khappa aji, tuhan? Ticabut?”
Tuhan : “khadu, nukhut ko khaya kehagani sanak.”
Sanak sai : “makasih tuhan yu, uttung wat niku.”

“lailahaillolloh, muhammadarrasululloh.”
sanak sai mak kimanan lagi, cekhabbus luwot.
nah, tipandi.

Oky Sanjaya

Lehot

nai, ki kanahni, niku jadi batang balak,
dang gelukga sakkah. Lamon ko pai buahmu.
nan mingan tisani bibit. Sumang ko pai sai,
pakai penganikku. Ki mak sappai kanah ni
di umurku, api si sepatutni ti sippon, dang sappai
ngebusuk. Tikanik. Tibibit. Hinno khaya,

Oky Sanjaya

Mindai

cik kaliccik
sapa haga mindai
ija tiwat kaliccik
cik kaliccik
sapa haga mindai
dang lainlain kicik

cik cecikhik
hinji lain timbunan
hinji lain sangkaan
mula dikicik-kicik
kokkoh pekhada bulipang

cik cecikhik
guk tegukguk
di hionni kicik
lapah kita tengangguk

ngangguk kidah, pun!
dipa kidah, kaliccik!

Oky Sanjaya

Tanoh

tanoh niku tanoh
tanoh pikha ngolloh
tanoh di pacul – sabah
tanoh di pacul – tekhah

tanoh niku tanoh
tanoh pikha uyak
tanoh di pacul – dakhak
tanoh di pacul – bekhak

tanoh niku tanoh
pikha di niku sabah
pikha di niku tekhah

pikha di niku dakhak
pikha di niku bekhak

tanoh di pikha ngolloh
lijung kita bulipang tuoh
tanoh di pikha uyak
lijung kita mid dunggak

Oky Sanjaya

Kisah Sanak Sai

sanak sai lelijung kundang
sanak sai mak lepas haga
nengisko Pekhmata Dilom Kaca

di awalni musik hinjilah awal cekhita
sanak sai mak kelatta
sanak sai mulai ngebilang, ngehitung di mata lima

“ayo kucakh lagi. Dang beni ga mekhok salok.
kanah tiwat jak tepi. Api cawaku. Mata lima, bang.
pak mak tiga sekurung. Labas khua ngecandung.”

(kuliak kupu suluh. Mata lima selesai tiunduh.)

sanak sai mulai nambah takhuhan
lelok di uccuk sayang

Oky Sanjaya

BANDUNG LAMBAN

lambanku, lamban banjakh batin
lamban tuha, sai nutuk sai tetuha

lambanku, lamban banjakh maghga
sai siaga, bupenah nutukan cawa
tuha di ucuk landi
nyakhung di ucuk janji

lambanku, lamban kita khua, Yuliya
lamban awal bulabuh;
mak kekhajja, mak mingan unduh
lamban kita khua, Yuliya;
genok pai api sai kita puh

lamban kita, lamban long khik abang
lamban tutuk adok
lamban guway kanah di kuti khompok
lain hak lelijungan; lain hak bulipang kakan

lambanmu, kahut, piyu sappai mit cukut
handap jak dunia maut, mehaccing di basoh teling.

di tetihang kelubang, wat pokok penyambung lamban
bulan kebilang bulan, mak asal nyikak awi
mak kukuh kanah tisani khesi


lambanku, lamban di kita hippun, puakhi
di setiap tayuh, wat selipok lambang sari
di kepitu khani, wat setundun-tundun putti

“api guwaymu, jong?”

di tukku, ngatukh hengasni apuy.
di kudan lamban, ngatukh kakanni jawan.

“hinji kidah, uppu, nyani lubang tatengah cucukh.”

“nangon hinno guwayni babbai tuha.”

“nangon makung keculuk-an sawwa. Induh ki ngelubang hawa.”

“ki hinno khadu ngekhatti sikam kajong, mingan mak ti taway lagi.”

“acak kidah mak ngebambang lagi?”

di tiwatni cucukh, putukni cawa.
senangun metokh, wuy, gula kelapa.
senangun taboh, wuy, di uccuk ni ma.

HIPPUN CEKHAMMA

Selamat debengi jama kita sai lagi pujama
Selamat debingi jama kita sai mak setakhu kecewa
Selamat ngelawan kicak sai lagi puhamma
Selamat ngelawan agas sai mahas-mahas di uyak sikindua.

Maka, kekalau selesai, kahut ni bahasa
Kekalau togok ni guwai cekhamma
Way di bolok awi
Mak bakal tekas lagi.

Kidang, lain sikindua maksud bupatoh ni ma
Kidang, wat sai mak mingan tekas jak kekhajja di lamban
Payu sikindua nutuk togokni guway
Kidang ngehapun jama sunyinni sai wat di kelasa;
Mak mingan nukhut hagani hippun.

Tunai ko khaya guwai sikindua di lamban
Nikham pekhadda ngekhati
Wat awi sai mingan ti tattai;
Wat sai busuya ditogokni guwai.

Maka, ki khanno kidah ni bahasa
Khanno munih selesai ni hippun sikindua
Khanno munih kicak di ucuk tihang
Ngekhatti khayalah puakhi.

BALIN CAKHA

mulani kita putungga
kekalau tunai alamat ni cawa
sekhadu sinji
busekhah sikindua
jama sai kuasa
mak balak ga

DI LAWOK MAMAK KENUT TILU ...

lambanlunik.blogspot.com, Senin, 21 Desember 2009

Hijjo sai ... badana lawan Mamak Kenut, mudah cawa, sai mudah genok rik mudah singut. Makkung lagi selesai ia ngebaca kumpulan puisi ni Oki Sanjaya, Di Lawok Nyak Nelepon Pelabuhan, radu macom macom cawa lawan jamma pekon ramik, tatu rayya jamma ramik mak paham di raribok ni Mamak Kenut. Hani Mamak Kenut, appai cutik halaman sai kubaca, kidang puisi kemanno mak ngabatok Ia tiram pekon, mak ngebatok Ia tebitta di pekon saka, tebitta di segala keriloh di waktu ngura tumbai. Mamak Kenut nuduh puisi di buku hinno dapok ticawakon lebih mirip terjemahan puisi puisi Indonesia umumna, Mamak Kenut mak ngehalukon suasana kelappungan di lom kuppulan puisi.

Halok kiku Mamak Kenut mewakili jamma ramik mayoritas, sai tiram Lappung rik buharap kuruk di nuansa kelappungan melalui puisi bahasa Lappung. Mamak kenut mewakili masayarakat awwam, mak ngeratti puisi. Kidang tian ngerasa nihhan sebagai pelaku budaya Lappung, kidang kik ti kain ngebaca puisi Lappung tian injuk jamma tilu, rik buta munih. Mak nengis, mak ngeliak rik mak ngerasa.

Guggoh haguk jamma ramik kik nengis lagu Lappung, tian haga mak suka kik mak ngehalukon nuansa kelappungan di lom lagu hinno. Apresiasi seni ni tian mak sensitif negis lagu terjemahan lagu lagu barih mit bahasa Lappung. Mana tian mak ngehaluko nuansa kelappungan di lom lagu terjemahan. Ranno munih bagi ni Mamak Kenut sai hejon di komunitas Lappung, balak ngehajjong rik nganak nguppu disan.

Sementara penulis sai kuawawa nengah umumna yaddo tian sai ngura ngura, sai makkung pira mesak, kidang radu tiakuk ti cappurko atau semawat mawatna ngaca lawan budaya barih, rik mesak disan. Tatu rayya suasana hijjo injuk wat sai lebon. Suasa kelappungan makkung parik terinventarisi radu ratong nuansa barih. Tian muloh ngerilong Lappung setelah lamon pengalaman di luar. Bagi sebagian jamma Lappung, lagu Lappung yaddo berirama gambus tunggal, atau gitar tunggal. Kidang bagi ni sanak ngura tattu rayya iringan organ tunggal lebih kaya di lom ragom ni alunan musik. Kidang bagi ni tian sai tuha tuha ninningan rik metilu tian sai nengis ya. Ram kelebonan titian, pandai pandai ram radu di luppak, wat tian sai gambang mak dapok muloh, kidang sanak ngura kemanno justeru riang.

Mamak kenut termasuk di kelompok sai lain ngura lagi, ia demon ngakuppul lawan tian sai seumur, induh induh api sai ni kicik ko tian, kidang serabbok serabbok ngelahai manjangan, kak tian tepor kuwawa seralloman, macom macom rik semapu di cerita, rik macom macom rik semapu munih diawak, sai barih pandai nihan hinno ikah awak, rik balak cawa, kidang tian sai barih mak urung riang nengis ya. Cerita kemanno ti ulok ulok mak ngedok leju. Rappa mak tiulok mana mak ngedok cerita barih.

Sanak ngura sumang cara buangon, cerita dang tiulok-ulok, perallu wat cerita barih, babak baru, kik mak ngedok cerita baru acak ngehamma. Puisi Oki Sanjaya rupana lebih timaksudkon untuk nibaca rik nikaji tian sai ngura ngura, sai wat jiwa seni, apresiasi ranggal. lain untuk ni Mamak Kenut, di urusan meraranno Mamak Kenut Tilu mak ngedok tenengisan, buta mak ngedok tengliak'an.

Lapah kutti Okki dang gambang lawan Mamak Kenut, lagi lamon sai makkung ti tulis ... kanah tatu ram petungga juga. Ranno hiyau ...puun

KITUK, lain cawa ruta.

lambanlunik.blogspot.com

KITUK

haku radu mesak ngajongko sukma
tiap bingi kusekituki
tiap mahayu lahir anak anjakni,
mak lagi

Karya Oky Sanjaya, Di Lawok Nyak Nelepon Pelabuhan.


Guggoh haguk sai barih ..., nyak munih tekanjat ngebaca puisi hijjo, waw ..., Oky Sanjaya bang cawa ruta. Kidang setelah naskah hijjo kubaca pepira kali, akhir na nyak berkesimpulan bahwa untuk ngebaca naskah seni puisi selain ram harus berimajinasi tinggi, ram munih harus makai lagika, penulis munih harus makai lagika, lagika ram harus sesuai munih haguk filosofi, tattu rayya filosofi sai sesuai haguk seni budaya Lampung, yaddon filosofi ni Lampung, filosofi ni Lappung yaddo Piil Pesenggiri. Hijjo munih ngebana nyak nyawakon bahwa seni Lampung dang lepas enjak nuansa ke-Lampung-an.Nyin ram massa nuansa ke-Lampungan-an hijjo ram dapok mengeksploitir keadaan geografis atau hal hal sai konkrit rik masalah abstrak sai wat di Lampung injuk falsafah umapamana atau salah satu diantara rua hinno.


Mawat ... !. Oky Sanjaya mak cawa ruta, mana hijjo ikah sukma. Lain raga. Sukma rattina jiwa. Di lom jiwa wat mind (pikiran) memory (ingok'an) rik intellect (kecerdasan). Lain ha' secara raga, kidang secara sukma ram ngedemoni sesuatu, maka bidang rani ram menyebadan (?) lawan api sai ram demoni hinno, mana sukma haga ngakain badan ram. Ketika sukma ngakain raga (badan) di lom api rayya, pikran, ingok'an ataupun kecerdasan, hinno radu termasuk bersebadan.
Jak lunik ram radu tikeni mengan, kidang mak sunyin ram jadi jamma sai demon mengan, wat rik ku badan na rayang. Bagi na ngalah ko mi sang piring adalah perjuangan, kidang wat munih sai payah nyasippok rappa carana kak mengan so mak nambuh. Mana Ia kak mengan dapok pak nambuh na sappai ruwa kali. Ia demon mengan bidang rani Ia mengan sai bangik bangik, bela duwit rik bela waktu untuk nyippok mengan, kak radu mengan pedom. Bagina seolah olah hurik untuk mengan


Kak radu mengan mak barih ram haga mising, mana mak sunyin api sai ti kanik jadi rah rik daging, wat sai mak beguna di badan, hijjo uppas geralna. Api sai haga nicawako Oky Sanjaya adalah lehot lawan ram jamma ramik jo. Dang hurik ram jo ikah untuk mengan, pudak pajuh, dan niperbudak tenai, mana ragga ram kanah mak lebih anjak api sai ni luar ko tenai hinno. KIdang hurik ram jo harus tiisi lawan sesuatu sai berarti. Hinno ngebana puisi hinno nitutup Oky Sanjaya makai kata kata "Mak Lagi"

KUMBANG KUPI

lambanlunik.blogspot.com, Senin, 28 Desember 2009


KUMBANG KUPI

handakmu
di lom pabrik ampai

Karya Oky Sanjaya, Di Lawok Nyak Nelepon Pelabuhan.


Lelawa handakni kumbang kupi, seberak ni tengliak sunyin batang kupi kumbang ni barong mecul, kidang hati jo mak pira riang malahan mecul ni kumbang kupi tisambut ram haguk "hah" - "hih". Hah ... kumbang kupi makkung tatu jadi buah, hih ... kumbang kupi serabbok lagi meruh, kumbang kupi kena labung meruh, kumbang kupi kena panas meruh. Handak ni kumbang kupi hagana gila ti sambut ram riang riang.

Oky Sanjaya ngilu jama ram ramik jo nyambut kumbang kupi palas lamon menyin, kumbang kupi mawat gawoh bangik ti liak kidang selebih na jak hinno kombang kupi haga ngusung harapan lawan jamma ramik. Kidang sekedau kebun tanno pira lagi beharap di kupi, mana kupi tanno mak pira beragga. Kumbang kupi handak handak seratta semerbak ni rum na, kidang sekedau na mak mehanjak.

Lain mana kupi mak lagi buragga, hasil na munih mak sepira. Kupi ti jual murah murah. Lamon sai nampung ya, mana tijual ragga mak sepira. Lamon tian sai batin rik mupawar tanno bangkrut, tumbai tian kuwawa perulang lapah haji. Tanna radu mak lagi, makin haga perulang lapah haji, kuk nyekula ko sanak mak kejiwa'an, makin ha' nyekulako sanak, kuk mengan dibbi pagi radu gehala.



Nasib ni petani kupi radu saka tehurruh, selalu tian ngucak ko mak buragga, kidang setemon na wat munih pihak sai kuwawa nampung ya lamon lamon, tianno yaddo sekedau pabrik. Kupi sai niucaskko tian mak beragga hinno ternyata tanno jo nyani tian jadi raja duwit. Kupi di tian panjak nihhan mahal raggana, kupi yaddo barang buragga.



Ram jadi mirrak ngeliak kupi ..., kidang kupi tanno radu beni hulun barih. Mak lulah dia. Handakni kumbang kupi di pabrik ampai.